＜回帶3星期前＞
我家小怪獸滿月喇！🎉
咁啱滿月嗰日係我第一個過嘅母親節。疫情加上行動力有限，都係買啲外賣，再晌 Petit Kitchen 訂咗兩個1字嘅蛋糕嚟同屋企人簡簡單單慶祝下。
呢個月過得好快，快到好似唔知點樣就過咗咁，可能因為失憶症越黎越嚴重啦，例如:
－唔記得今日星期幾，淨係記得救世主明日放假
－唔記得昨晚臨瞓前同今朝起身後有冇洗面刷牙。後尾諗諗下又覺得無所謂，反正一覺都係2個鐘左右
－唔記得哥哥妹妹上一餐幾點食、食咗幾多、換咗片未、開大定細，一定要用個app記錄低再開返黎睇
其實不停重覆餵奶－＞掃風－＞再餵奶－＞換片－＞餵奶真係好攰，仲要做咩都打孖黎，真係攰到餵緊奶都瞓得著呀！不過見到佢哋越黎越抵打，內心又暗暗高興。
講到對小怪獸s嘅期望，我同怪獸嘅方向係一致既，唔使好叻，但要正直善良，有同理心同思考能力，明辨是非。
晌正常嘅情況下我哋無法陪佢哋行完佢哋嘅人生路，做父母嘅只可以盡量分析利弊畀佢哋聽，等佢哋自己再諗條路點行。當然我哋亦都會尊重佢哋選擇，正所謂「條路自己揀，xx唔好喊」嘛。
可惜嘅係，佢哋將來成長嘅環境同佢哋父母當年成長嘅已經有天淵之別，好多野返唔到轉頭。
爸爸媽媽應承你哋，會盡最大嘅努力為你哋提供適合成長嘅環境，做你哋嘅避風港。🥰
#下星期就2個月大喇
Search